O BNG denuncia o mal estado do parque do Seixedo

Valados de obras sen facer para advertir das deficiencias do Seixedo
Valados de obras sen facer para advertir das deficiencias do Seixedo
As deficiencias son un perigo para nenos e maiores que utilizan o parque como zona de lecer.
O BNG denuncia o mal estado do parque do Seixedo

O BNG de Arteixo quere denunciar publicamente o estado no que se atopa o parque do Seixedo en Arteixo. O parque é zona de lecer dos habitantes de Arteixo e está nunhas condicións lamentables.

Cun paseo polo parque podemos atopar numerosas deficiencias que poñen en perigo á veciñanza, tanto nenos e nenas como maiores. Obsérvanse valados de obra postos polo Concello diante das deficiencias. E xa non son obras transitorias nin momentáneas posto que xa levan varios meses nese estado. Ademais, existen enchufes descuberto á altura e alcance de crianzas e mascotas. Estes poden ocasionar algún desgusto no caso de que os paneis solares funcionen. Non obstante, ante o deterioro de materiais observado, tamén dubidamos de que estes paneis estean en funcionamento.

Por outra parte, a pasarela que cruza O Seixedo xa precisa reparacións importantes antes da súa inauguración.

Tamén o camiño está desfeito por tramos, chegando a ser case inexistente nalgunhas zonas. Así mesmo, as pontes que cruzan o río atópanse en malas condicións, faltando travesas de madeira, co perigo para as persoas de tropezar e caer. Ademais, existen derrubamentos das beiras do camiño froito das medras de caudal do río en inverno.

Finalmente, o Concello non retirou as podas feitas hai uns meses e, aínda hoxe, podemos atopar as árbores cortadas.

Por todo iso, desde o BNG queremos denunciar o mal estado do parque do Seixedo e o desinterese do goberno do PP de Arteixo por manter coidadas as zonas de lecer de Arteixo.  

O BNG denuncia o mal estado do parque do Seixedo